Ààrẹ Bola Tinubu ti pa àṣẹ fún gbogbo àwọn òṣìṣẹ́ ìjọba tí wọ́n yàn sípò nínú ìjọba rẹ̀, tí wọ́n sì ní lọ́kàn láti díje fún ipò kankan nínú ìdìbò gbogboògbò ọdún 2027, láti kọ̀wé fiṣẹ́ sílẹ̀ lọ́jọ́ kọkànlélọ́gbọ̀n oṣù Kẹta ọdún 2026 (March 31, 2026) tàbí kí ọjọ́ náà tó pé.

Àṣẹ ààrẹ yìí, tó kan àwọn mínísítà, àwọn ọ̀gá àjọ ìjọba, àti àwọn olùrànlọ́wọ́ ààrẹ, wà fún títẹ̀lé òfin ìdìbò orílẹ̀-èdè yìí gẹ́gẹ́ bí ó ṣe yẹ, kí ètò ìdìbò tó ń bọ̀ bá lè mọ́ tótó.

Gẹ́gẹ́ bí ìwé ìfilọ̀ kan látọ̀dọ̀ ọ́fíìsì Akọ̀wé fún ìjọba àpapọ̀ (SGF) ṣe sọ, àṣẹ yìí wáyé ní ìbámu pẹ̀lú abala kẹrin-dín-láádọ́rùn-ún (Section 88(1)) ti òfin ìdìbò ọdún 2026, àti ìtòlẹ́sẹẹsẹ tí àjọ ìdìbò (INEC) gbé jáde fún ìdìbò abẹ́nú ẹgbẹ́ òṣèlú.

Ìwé ìfilọ̀ náà, tí Akọ̀wé fún ìjọba àpapọ̀, Sẹ́nátọ̀ George Akume fọwọ́ sí, sọ pé àṣẹ náà kan ọ̀pọ̀lọpọ̀ àwọn òṣìṣẹ́ tó kún fún àwọn mínísítà, àwọn olùrànlọ́wọ́ àkànṣe fún ààrẹ, àti àwọn míràn.

Bẹ́ẹ̀ gẹ́gẹ́, àṣẹ náà tún kan gbogbo àwọn olùdarí àgbà (Directors-General) àti àwọn ọ̀gá pátápátá (CEOs) fún gbogbo àjọ ìjọba àpapọ̀, àwọn kọmíṣọ́nà, àti àwọn ilé-iṣẹ́ tí ìjọba lẹ́sẹ̀ nínú rẹ̀, tó bá ti jẹ́ pé wọ́n fẹ́ díje fún ipò òṣèlú.

Ààrẹ Tinubu tẹnu mọ́ ọn pé ìgbésẹ̀ yìí pọn dandan láti rí i pé gbogbo ènìyàn tẹ̀lé òfin ìdìbò, kí iṣẹ́ ìjọba bá lè tẹ̀síwájú nínú òtítọ́, kí ẹni kankan má sì lo ipò rẹ̀ láti lẹ́nu ju àwọn míràn lọ lásìkò ìdìbò.

Gbogbo àwọn tí ọ̀rọ̀ yìí kàn gbọ́dọ̀ kọ̀wé fiṣẹ́ sílẹ̀ ránṣẹ́ sí ọ́fíìsì SGF kí ọjọ́ kọkànlélọ́gbọ̀n oṣù Kẹta (March 31) tó pé. Nípa títẹ̀lé àkókò yìí, ìjọba fẹ́ dènà lílo ohun-èlò tàbí ọ́fíìsì ìjọba láti jèrè àìtọ́ lásìkò ìdìbò abẹ́nú ẹgbẹ́ òṣèlú.

Ààrẹ tún tẹnu mọ́ ìpinnu rẹ̀ láti mú kí ètò ìdìbò ní Nàìjíríà dán mọ́rán, ó sì rọ gbogbo àwọn òṣìṣẹ́ tí ọ̀rọ̀ kàn láti tẹ̀lé àṣẹ yìí pátápátá