Agbábọ́ọ̀lù orílẹ̀-èdè Faransé àti ti ẹgbẹ́ Paris St-Germain, Ousmane Dembele, ti gba àmì-ẹ̀yẹ Ballon d’Or, èyí tí í ṣe àmì-ẹ̀yẹ fún agbábọ́ọ̀lù tó dára jù lọ lágbàáyé, fún ìgbà àkọ́kọ́.

Agbábọ́ọ̀lù iwájú orílẹ̀-èdè Faransé, tó jẹ́ ọmọ ọdún 28, gba góólù 35, ó sì ran àwọn ẹgbẹ́ rẹ̀ lọ́wọ́ láti gba góólù 14 mìíràn nínú ìdíje 53 fún PSG ní sáà tó kọjá nígbà tí wọ́n gba àwọn ife mẹ́ta, títí kan Champions League àkọ́kọ́ wọn.

Òun ni àwọn tó bá fi góólù jù lọ jọ pín ipò ní Ligue 1, pẹ̀lú góólù 21, wọ́n sì yan an gẹ́gẹ́ bí agbábọ́ọ̀lù tó dára jù lọ ní ìpele ìdíje tó ga jù lọ ní Faransé àti ní Champions League.

Ó tún ran PSG lọ́wọ́ láti dé ìparí Club World Cup, níbi tí wọ́n ti pàdánù sí Chelsea ní New Jersey.

Dembele, tó borí ọ̀dọ́mọdẹ Barcelona, Lamine Yamal, láti gba àmì-ẹ̀yẹ náà, lè lọ síbi ayẹyẹ náà ní Paris — ó sì ń sọkún bí ó ṣe dúró lórí pèpéle — bótilẹ̀jẹ́pé ẹgbẹ́ rẹ̀ ń ṣeré ní ìrọ̀lẹ́ Ọjọ́ Ẹtì.

Agbábọ́ọ̀lù iwájú náà kò sí nínú ìdíje lọ́wọ́lọ́wọ́ nítorí ìpalára, èyí sì jẹ́ kí ó pàdánù ìdíje tí PSG pàdánù sí Marseille ní ilé pẹ̀lú góólù 1-0 nínú ìdíje tí wọ́n ṣètò rẹ̀ padà nítorí ìjì líle.

Dembele ti fi ìdára hàn nígbẹ̀yìn, èyí tó mú kí Barcelona san 96.8 mílíọ̀nù pọ́n (£96.8m), tó lè gbéró dé 135.5 mílíọ̀nù pọ́n (£135.5m), láti fowó ra a lọ́wọ́ Borussia Dortmund ní ọdún 2017.

Àmọ́ ṣáá, PSG — tí wọ́n yan gẹ́gẹ́ bí ẹgbẹ́ tó dára jù lọ nínú ayẹyẹ Ballon d’Or ti ọdún 2025 — ni ẹgbẹ́ tó san owó rẹ̀ ní wọ́ọ́, nígbà tí wọ́n fowó ra a ní 43.5 mílíọ̀nù pọ́n (£43.5m) péré ní ọdún 2023.

Dembele tún gba góólù méjì nínú ìdíje méje fún orílẹ̀-èdè Faransé ní 2024-25.

Òun ni ọmọ orílẹ̀-èdè Faransé kẹfà tó gba àmì-ẹ̀yẹ náà, òun sì ni ẹlẹ́ẹ̀kejì nínú ọ̀rúndún kọkànlélógún lẹ́yìn Karim Benzema ní ọdún 2022.

Lamine Yamal, ọmọ ọdún 18, gbẹ̀yìn ní ipò kejì — ó sì tún gba Kopa Trophy fún agbábọ́ọ̀lù ọ̀dọ́ tó dára jù lọ.

Agbábọ́ọ̀lù àárín gbùngbùn ti PSG àti Portugal, Vitinha, wà ní ipò kẹta, Mohamed Salah ti Liverpool sì wà ní ipò kẹrin.

Cole Palmer ti Chelsea àti England parí ìdíje náà ní ipò kẹjọ.

Ẹni tó gba àmì-ẹ̀yẹ náà ní ọdún tó kọjá, agbábọ́ọ̀lù àárín gbùngbùn ti Manchester City àti Spéìn, Rodri, kò sí nínú àtòpọ̀ àkọ́kọ́ ní sáà yìí lẹ́yìn ìdíje tí ìpalára bàjẹ́ fún un.