Adájọ́ James Omotosho ti dájọ́ ẹ̀wọ̀n gbére fún aṣáájú ẹgbẹ́ Indigenous People of Biafra (IPOB) tí wọ́n fi òfin dè, Nnamdi Kanu, lẹ́yìn tí ó rí i pé ó jẹ̀bi gbogbo ẹ̀sùn ìpániláyà (terrorism) méje tí wọ́n fi kàn án.

Nígbà tí ó ń gbé ìdájọ́ náà kalẹ̀, Adájọ́ Omotosho ṣàkíyèsí pé, “ẹni tí a dá lẹ́bi náà kò hùwà dáradára ní gbogbo àsìkò ìgbọ́rọ̀ọ́jọ́ náà,” ó sì tẹnu mọ́ ọn pé ó ti fa ìdádúró tí kò pọn dandan nínú ẹjọ́ náà.

Ó tún sọ pé ilé ẹjọ́ kò ní wo ti àìbọ̀wọ̀ fún ilé ẹjọ́ (contempt of court) tí aṣáájú IPOB náà ṣe nígbà tí òun ń gbé ìdájọ́ rẹ̀ kalẹ̀.

Omotosho sọ pé, “Ilé ẹjọ́ ń ṣàánú fún Kanu nìkan nítorí pé Olúwa wa Jésù Krístì sọ pé kí a jẹ́ aláàánú. Kanu kò fi àbámọ̀ kankan hàn; ó gbéraga, ó kún fún ìfọ́nnu, kò sì ní ìtẹríba. Èmi yóò fi àánú kún ìdájọ́.”

Omotosho tún fa ọ̀rọ̀ yọ láti inú Bíbélì pé, “Mátíù Orí Kẹtàlélógún nínú Bíbélì Mímọ́ èyí tí ó wàásù àánú.”

Adájọ́ Omotosho kéde àwọn ìdájọ́ mìíràn bíi wọ̀nyí:

• Fún ẹ̀sùn kẹta (count 3), ó dájọ́ ẹ̀wọ̀n ogun ọdún (20 years) fún Kanu.

• Fún ẹ̀sùn keje (count 7), ó dájọ́ ẹ̀wọ̀n ọdún márùn-ún (5 years) fún un.

• Kò sí àyè láti san owó ìtanràn fún méjèèjì.

Àwọn ẹ̀wọ̀n náà yóò lọ lẹ́ẹ̀kan náà (concurrently) – èyí tí ó túmọ̀ sí pé ẹ̀wọ̀n gbére náà ló dúró.

Omotosho sọ pé dandan ni kí wọ́n fi Kanu sí ibi tí ó bá a mu nítorí pé ó ní àwọn ànímọ́ ìwà ipá, èyí tí ó tún fi hàn ní ilé ẹjọ́ ní gbangba.

Adájọ́ náà tún kéde pé wọn kò gbọdọ̀ gba ẹlẹ́wọ̀n náà láàyè láti lo ẹ̀rọ ayélujára/ìbánisọ̀rọ̀ (digital devices) kankan, bí ó bá sì pọn dandan, Olùdámọ̀ràn Ààbò Orílẹ̀-èdè (National Security Adviser) gbọ́dọ̀ máa ṣọ́ ọ fínnífínní.

Ilé ẹjọ́ pàṣẹ pé kí wọ́n fi ẹlẹ́wọ̀n náà sí ibi ààbò ìpamọ́ (protective custody) ní apá ibikíbi ní orílẹ̀-èdè yìí.

TVC ti ròyìn tẹ́lẹ̀ pé Adájọ́ James Omotosho ti Ilé Ẹjọ́ Gíga Àpapọ̀ ní Àbújá ti dá Nnamdi Kanu lẹ́bi gbogbo ẹ̀sùn ìpániláyà méje tí Ìjọba Àpapọ̀ fi kàn án.

Nígbà tí ó ń dá ẹjọ́ ní Ọjọ́bọ̀, Adájọ́ Omotosho tọ́ka sí àwọn ẹ̀rí tí àwọn olùpẹ̀jọ́ mú wá, títí kan àwọn fídíò ìfọ̀rọ̀wánilẹ́nuwò, àwọn ìgbóhùnsáfẹ́fẹ́ níbi tí Kanu ti ṣe àwọn ìhalẹ̀ oníwà-ipá sí Nàìjíríà àti àwọn aráàlú, gẹ́gẹ́ bí ìpìlẹ̀ fún ìdájọ́ ẹ̀bi náà.