Àwọn àgbẹ̀ àti àwọn darandaran ja ìjà ní Ọjọ́bọ (Thursday) ní abúlé Unguwar Dambo, ní Agbègbè Ìjọba Ìbílẹ̀ Birnin Kebbi, Ìpínlẹ̀ Kebbi.

Gẹ́gẹ́ bí Alhaji Faruku, ẹlẹ́rìí kan ti sọ, àwọn darandaran, tí wọ́n ti wà nínú ìjà pẹ̀lú àwọn àgbẹ̀, fi ìsẹ́ ránṣẹ́ sí wọn láti yára kórè àwọn ohun ọ̀gbìn wọn.

Ìdí ni pé wọ́n máa kọjá láàrin oko wọn pẹ̀lú agbo màlúù.

Síbẹ̀síbẹ̀, àwọn àgbẹ̀, tí wọ́n kò gbọ́ ìkìlọ̀ wọn, lọ sí oko wọn, àwọn darandaran Fulani sì wá kọ lù wọ́n nígbà tí wọ́n ń ṣiṣẹ́.

Àwọn darandaran náà pa Malam Sule, àgbẹ̀ kan, láti abúlé náà.

Pípa tí wọ́n pa á dá ìbínú sílẹ̀ nínú abúlé náà, èyí tí ó yọrí sí ìgbẹ̀san láti ọ̀dọ̀ àwọn àgbẹ̀, tí ó sì gba ẹ̀mí darandaran Fulani kan tí wọ́n kò tíì dá mọ̀.

Orísun ìròyìn wa, tí ó pàdánù ẹ̀gbọ́n aya rẹ̀, bẹ àwọn aláṣẹ láti fi òpin sí ìṣòro tí ó ti pẹ́ láàrin àwọn darandaran àti àwọn àgbẹ̀ ní abúlé náà.

Ó sọ pé: “Ìṣòro náà kì í ṣe tuntun, àwọn ọba ìbílẹ̀ agbègbè náà sì mọ̀ ọ́n. A retí ìdájọ́ òdodo fún ẹni tí wọ́n pa, a sì tún ń béèrè fún òpin sí ìjà yìí.”

Nígbà tí wọ́n ń tẹ ìwé ìròyìn lọ́wọ́, Ọlọ́pàá kò tíì dáhùn sí àwọn ìbéèrè tí wọ́n rán sí wọn fún ìfìdí-múlẹ̀ tàbí fún apá tiwọn nínú ìtàn náà.