Ìyá Ààrẹ Nàìjíríà, Oluremi Tinubu, ti darapọ̀ mọ́ àwọn ẹlẹgbẹ́ rẹ̀ láti gbogbo àgbáyé ní Àpèjọ Kẹta Ọdún ti Global First Ladies Alliance Academy ní New York, Amẹ́ríkà, láti wéwèé bí ipa ìṣàkóso wọn ṣe lè mú ìyípadà rere bá ipò àgbáyé tó ń yí pa dà kánkán.

Ìyáàfin Tinubu tẹnu mọ́ ìpátákì àwọn ọ̀nà àtunmọ̀lára láti kojú àwọn ìṣòro tí àwọn ẹgbẹ́ aláìlágbára ń dojú kọ ní Nàìjíríà.

Ó sọ pé ètò Renewed Hope Initiative (RHI) tí òun dá sílẹ̀ dá lórí fífún àwọn obìnrin àti àwọn ọ̀dọ́ lágbára láti mú kí ìgbésí ayé ìdílé sunwọ̀n sí i.

Oluremi Tinubu – VON

“Ip0 yìí nira gan-an. Ohun tí ẹ bá ṣe yálà yóò ran ọkọ yín lọ́wọ́ tàbí yóò di àjàgà fún un. Nítorí náà, ẹ ṣe ohun tí ẹ bá lè ṣe kí ẹ sì ṣe é dáadáa,” ni ó sọ.
“Ẹ má ṣe bẹ̀rù láti fi kékeré yín hàn. Kékeré yẹn lè di ìgbàlà fún ẹnì kan. Ẹ jẹ́ alágbára láti dojú kọ àwọn ìṣòro yín, àti pé ohun tí a ń ṣe nìyẹn, a sì ti bẹ̀rẹ̀ sí í rí ipa rẹ̀ díẹ̀díẹ̀.”

Àwọn ìyá Ààrẹ láti Angola, Armenia, Belize, Guatemala, Iceland, Malawi, Mozambique, Panama, àti Sierra Leone wà níbẹ̀, pẹ̀lú ọ̀pọ̀ àwọn ìyá Ààrẹ àtijọ́. Àwọn ìjíròrò dá lé àwọn ìṣòro àgbáyé tó wọ́pọ̀ bíi ìlera ọpọlọ àti ìlera àwọn ọ̀dọ́, ìlera àwọn tó wà ní ìtọ́jú oyún, ààbò oúnjẹ, àti ìlọsíwájú kánkán ti ìmọ̀ ẹ̀rọ àyédèrú (artificial intelligence).

Dókítà Cora Neumann, Aṣòfin Ìpínlẹ̀ Montana àti olùdásílẹ̀ Àjọ náà, sọ fún àwọn olùkópa wípé ipò olórí wọn gbọ́dọ̀ gbòòrò ju àkókò tí wọ́n wà nípò lọ.

“Àwọn èrò, ìṣòro àti òye yín ti mú gbogbo apá kan ìrírí yìí dàgbà, a sì gbà yín láyè, a sì retí pé ẹ ó tẹ́wọ́ gbà láti máa bá wa mú un dàgbà,” ni ó sọ.
“Papọ̀, ẹ ń ṣeto ìlànà àgbáyé fún ohun tí ó túmọ̀ sí láti jẹ́ Alábàákẹ́gbẹ́ Àkọ́kọ́ tí ó munádóko — papọ̀, ẹ jẹ́ àbá àti àìní mílíọ̀nù mílíọ̀nù ènìyàn.”

Ó gbà wọ́n níyànjú pé kí wọ́n máa fi Ọkàn-àyà ṣe aṣáájú.

Ìṣẹ̀lẹ̀ náà, tí àjọ Global First Ladies Alliance ṣètò ní ìfọwọ́sowọ́pọ̀ pẹ̀lú Mailman School of Public Health ti Columbia University, jẹ́ pátákì gẹ́gẹ́ bí pẹpẹ ìdánilẹ́kọ̀ọ́ ìṣàkóso tó ga, tí a fàyà si láti mú ipa àti agbára ìṣiṣẹ́ àwọn ìyá Ààrẹ pọ̀ sí i àti láti kọ́ àwọn àjọṣepọ̀ ìṣàkóso àgbáyé.

Wọ́n retí pé Ìyáàfin Tinubu yóò sọ̀rọ̀ pàtó kan nígbà tó bá tẹ̀ lé e nínú ètò náà, yóò tẹnu mọ́ àwọn ìṣètò rẹ̀ fún àwọn ọmọdé, obìnrin, àti àwọn ọ̀dọ́ ní Nàìjíríà.

Orisun:VON