Ààrẹ America, Donald Trump, ti fi ìdánilójú hàn pé orílẹ̀-èdè Amẹ́ríkà yóò máa bá a lọ láti fún Ukraine ní àtìlẹ́yìn láìka ohun tí yóò jáde láti inú ìpàdé tí wọ́n ṣe láti gba àlàáfíà láyè láàárín Rọ́ṣíà àti Ukraine sí.

Trump fi ìdánilójú hàn dáadáa pé Amẹ́ríkà yóò ran Europe lọ́wọ́ láti pèsè ààbò fún Ukraine gẹ́gẹ́ bí ara àdéhùn kankan láti fi òpin sí ogun Rọ́ṣíà ní Ukraine.

“Nípa ààbò, ọ̀pọ̀lọpọ̀ ìrànlọ́wọ́ yóò wà,” ni Trump sọ fún àwọn oníròyìn, ó fi kún un pé àwọn orílẹ̀-èdè Europe yóò kópa nínú rẹ̀.

“Wọ́n jẹ́ ìlà ìgbèjà àkọ́kọ́ nítorí pé wọ́n wà níbẹ̀, ṣùgbọ́n a ó ràn wọ́n lọ́wọ́. Bákan náà, àwa náà yóò kópa.”

Ṣùgbọ́n, ó sọ pé òun kò gbàgbọ́ mọ́ pé gbígbà ìdáwọ́-ìjà-dúró ni ohun pàtàkì tí ó yẹ kí ó kọ́kọ́ wáyé fún ṣíṣe àdéhùn àlàáfíà, nípa bẹ́ẹ̀, ó ti gba èrò kan tí Ààrẹ Rọ́ṣíà, Vladimir Putin, ti fi lélẹ̀, èyí tí Ààrẹ Ukraine, Volodymyr Zelenskiy, àti ọ̀pọ̀lọpọ̀ àwọn olórí Europe lòdì sí.

Nígbà tí wọ́n bi í pé “Ṣé òpin ọ̀nà ni èyí fún àtìlẹ́yìn Amẹ́ríkà fún Ukraine bí ìpàdé náà bá já sí àdéhùn tàbí kò sí àdéhùn?”

Ó dáhùn pé, “N kò lè sọ bẹ́ẹ̀ rárá. Kì í ṣe òpin ọ̀nà láéláé. A ń pa àwọn ènìyàn, a sì fẹ́ dá a dúró.

Nítorí náà, n kò lè sọ pé òpin ọ̀nà ni.” Lákòókò yìí, Zelensky ti Ukraine sọ pé Kyiv ti múra tán láti wá ọ̀nà ìbáraẹnisọ̀rọ̀ láti fi òpin sí ogun Rọ́ṣíà, ó tẹnu mọ́ ọn lẹ́ẹ̀kan sí i pé Kyiv fẹ́ ìpàdé àwọn orílẹ̀-èdè mẹ́ta pẹ̀lú Moscow àti Washington.

Nígbà tí wọ́n bi í léèrè pé “Ṣé Ukraine ti múra tán láti tún àwọn àwòrán ilẹ̀ yà nínú àdéhùn àlàáfíà, tàbí kí wọ́n máa bá a lọ láti rán àwọn ọmọ ogun Ukraine sí ikú fún ọdún díẹ̀ mọ́,”

Zelensky kò dáhùn dáadáa, ṣùgbọ́n ó yin ìgbìyànjú ìjọba Trump láti dá ogun náà dúró.

Zelensky sọ pé Ukraine ní láti máa gbé pẹ̀lú àwọn ìkọlù Rọ́ṣíà ojoojúmọ́, ó tọ́ka sí ìkọlù tí ó pa ènìyàn tí Rọ́ṣíà ṣe ní alẹ́ lórí Kharkiv.

Agency News